ആകെ പേജ്‌കാഴ്‌ചകള്‍

2014, നവംബർ 16, ഞായറാഴ്‌ച

ചുംബനം



രാജകുമാരി
--------------

പുതുപനിനീർദളരാജികൾതൻ
മൃദുലത വെല്ലുന്ന തല്പമൊന്നിൽ
അഴകിനെവെന്നു കിടക്കയാണാ-
തളിരിളം മേനി കിനാവിൽ മുങ്ങി.
മുകളിലിളംകാറ്റിലാടി നീല-
ഞൊറികളും പട്ടുമേലാപ്പുമെല്ലാം
മുറിയതിൽ മങ്ങി പ്രഭപരത്തും
മണിവിളക്കിൻ മഞ്ജുകാന്തി ചിന്നി
കുനുകൂന്തൽ നീലച്ചുരുളുതന്നിൽ
പവിഴമണികൾ തെളിഞ്ഞുമിന്നി.
കസവിട്ട പട്ടുതലയണയിൽ
ചുളിവുകൾ മന്ദമമർത്തിനിർത്തി
കവിത വിരിയുന്ന നീലരാവിൽ
അവളാ സുഷുപ്തിയിലാണ്ടുപോയി.
മദനവികാരവിജൃംഭിതമാം
മുഴുമാറിൽ സൌഗന്ധകുന്തളത്തിൻ
കരലാളനങ്ങളുമേറ്റുമന്ദ-
മവൾ ഗാഢനിദ്രയിലാണ്ടുപോയി.

രാജകുമാരൻ
-----------------

അണയുകയാണവൻ, കിട്ടിടാത്തോ-
രസുലഭരത്നം കവർന്നെടുക്കാൻ
ഹൃദയം മിടിക്കുന്നു, കാത്തിരുന്നോ-
രുദയമടുക്കുന്നു മുന്നിലിപ്പോൾ
പിടയുകയാണവൻ, തന്മുഖത്തിൽ
സ്ഫുടമായ് തെളിയുന്നതുണ്ടു ചിത്തം
അടിവെച്ചടിവെക്കേ, കാലടികൾ-
ക്കടിയിൽ നിന്നൂർന്നൊരു മന്ദ്രനാദം
അതിശാന്തമന്ത:പുരത്തിനുള്ളി-
ലൊരു യുദ്ധമേഖല തീർത്തിരുന്നു.

ഈരടികൾ
---------------


ഒരു ഞെട്ടൽ, ചുണ്ടിന്നിണകൾതീർത്ത
സ്മരശരചുംബനമത്രമാത്രം !
അവളുണർന്നാപ്പട്ടുമെത്ത ഞെങ്ങി
പവിഴമണിക്കവിളൊന്നുരുമ്മി
പടപട വാതിൽ പലക തട്ടി
പടിവാതിൽ കാവല്ക്കാരൊന്നു ഞെട്ടി
പടപട നീണ്ട കുളമ്പടികൾ
ഇടയിലീ പ്രേമത്തിന്നീരടികൾ:
“കമിതാവാമെന്നെ വലിച്ചിഴച്ചോ-
രമിതസൌന്ദര്യമേ മാപ്പു നല്കൂ !”

(ടെനിസൺ എഴുതിയ ‘സ്ലീപ്പിങ്ങ്‌ ബ്യൂട്ടി’ എന്ന കവിതയോട്` കടപ്പാട്‌)

12 അഭിപ്രായങ്ങൾ:

  1. അത്തറിൻ സുഗന്ധവും പൂശിയെൻ മലർച്ചെണ്ടീ,
    മെത്തയിൽ വിടർന്നുവല്ലോ...
    മാണിക്യ മണിമുത്തുക്കവിളെന്റെ കവിളിലെ
    മങ്ങലിൽ തിളങ്ങി നിന്നല്ലോ... :)

    ശ്രീകുമാരൻ തമ്പി സാറിന്റെ വരികളിങ്ങനെയൊന്നു മാറ്റിപ്പാടിയാൽ മധുസൂദനൻ സാറിന്റെ പ്രണയാതുരനായ രാജകുമാരനു നന്നായിണങ്ങുമെന്നു തോന്നുന്നു. :) സൃഷ്ടിയിൽ ആത്മാർത്ഥത കലരുമ്പോൾ, സംഗീതത്തിനും, കവിതക്കും, കഥകൾക്കുമൊന്നും ഭാഷയൊരു പ്രശ്നമാവുന്നില്ലെന്നത്‌ വളരെ ശരി. പ്രണയം തുളുമ്പുന്ന വരികളും, അതിനനുയോജ്യമായ ചിത്രവും കൈകോർത്തു നിൽക്കുമ്പോൾ കവിയുടെ ഉള്ളിലെ പ്രണയം അനുവാചകർക്കനുഭവേദ്യമാകുന്നു. വളരെ നന്നായിരിക്കുന്നു കവിത.

    really a romantic poem that unveils the beauty of sleeping romance inside you...



    ശുഭാശംസകൾ സർ.....

    മറുപടിഇല്ലാതാക്കൂ
  2. ചിത്രം കാണുന്ന ഭംഗി വരികള്‍ക്ക്.

    മറുപടിഇല്ലാതാക്കൂ
    മറുപടികൾ

    1. റാംജീ, സന്തോഷം. താങ്കൾ ഒരു ചിത്രകാരൻ കൂടിയാണല്ലോ

      ഇല്ലാതാക്കൂ
  3. മറുപടികൾ
    1. നന്ദി വിനോദ്കുമാർ. ഈ വരവിനും അഭിപ്രായത്തിനും

      ഇല്ലാതാക്കൂ
  4. ഒരു പ്രണയാര്‍ദ്രമായ നല്ല സ്വപ്നദൃശ്യം...!

    മറുപടിഇല്ലാതാക്കൂ
  5. അക്ഷരങ്ങൾകൊണ്ട് കവിതയുടെ രൂപത്തിൽ ചിത്രം വരച്ചിരിക്കുന്നു,,,

    മറുപടിഇല്ലാതാക്കൂ
    മറുപടികൾ

    1. സന്തോഷം.ഇഷ്ടപ്പെട്ടതിൽ.
      ടീച്ചർ വേണമെങ്കിൽ ഒരു ഫോട്ടോ എടുത്തോളൂ.

      ഇല്ലാതാക്കൂ